Waslu r-riżultati: it-tielet Programm tas-Saħħa tal-UE miexi kif ippjanat u qed iħalli impatt.
Il-Programm tas-Saħħa hu evalwat f’nofs it-terminu u fl-aħħar tat-terminu ta’ sitt snin biex naraw li l-infiq pubbliku hu ġġustifikat u qed jipproduċi benefiċċji reali, spjega d-Deputat Direttur Ġenerali għas-Saħħa u s-Sikurezza Alimentari Martin Seychell. L-evalwazzjoni ta' nofs it-terminu tat-tielet Programm tas-Saħħa (2014-2020) ivvalutat ir-rilevanza tal-proġetti li qed jiffinanzja biex jintlaħqu l-bżonnijiet u l-isfidi reali fil-qasam tas-saħħa, l-effettività tal-immaniġġjar tal-Programm, l-effikaċja u l-koerenza tiegħu mal-politiki u l-Programmi l-oħrajn tal-Unjoni u l-impatti mistennija. Seychell spjega aktar dwar il-Programm tas-Saħħa fih innifsu u r-riżultati ta’ din l-evalwazzjoni riċenti.
X’inhu l-għan tat-tielet Programm tas-Saħħa?
It-tielet Programm tas-Saħħa tal-UE, li għandu baġit totali ta’ €449.4 miljun, hu l-għodda finanzjarja ewlenija tal-Kummissjoni Ewropea użata biex tiffinanzja azzjonijiet li jikkumplementaw, jappoġġjaw u jżidu l-valur tal-politiki tas-saħħa tal-Istati Membri. L-oqsma ta’ prijorità u l-kriterji għall-azzjonijiet ta’ finanzjament skont il-Programm huma deskritti fil-pjanijiet ta’ ħidma annwali ppreparati mid-Direttorat Ġenerali għas-Saħħa u s-Sikurezza Alimentari u adottati mill-Kummissjoni wara konsultazzjoni mal-Istati Membri.
Il-Programm tas-Saħħa għandu erba’ objettivi ewlenin: li jippromwovi s-saħħa, li jevita l-mard u li jrawwem ambjenti li jappoġġjaw stili ta’ ħajja tajbin għas-saħħa; li jipproteġi liċ-ċittadini tal-UE minn theddid transkonfinali serju għas-saħħa, jikkontribwixxi għal sistemi tas-saħħa innovattivi, effiċjenti u sostenibbli u jgħin sabiex iċ-ċittadini tal-UE jingħataw aċċess għal kura tas-saħħa aħjar u aktar sikura.
Ġew jew qegħdin jiġu ffinanzjati aktar minn 539 azzjoni permezz tat-tielet Programm tas-Saħħa mill-2014 sal-2020 għal nefqa totali ta’ €165.6 miljun.
Kif jibbenefikaw iċ-ċittadini tal-UE mill-Programm tas-Saħħa?
Il-Programm tas-Saħħa jinkoraġġixxi lill-Istati Membri biex jikkooperaw u jagħmlu progress fuq kwistjonijiet ta’ interess komuni. Filwaqt li kull Stat Membru hu responsabbli għall-kwalità tas-saħħa u l-kura tas-saħħa għaċ-ċittadini tiegħu, ħafna drabi isir aktar progress billi naħdmu flimkien fuq il-livell tal-UE, pereżempju fil-qasam tal-mard rari fejn in-Netwerks Ewropej ta’ Referenza qed jgħinu biex l-għarfien espert ta’ speċjalisti li ħafna drabi mhux faċli ssibu jasal għand il-pazjenti tal-UE li għandhom bżonnu, irrispettivament minn fejn joqogħdu.
X’kienu r-riżultati tal-evalwazzjoni l-aktar riċenti?
Ir-riżultati kienu inkoraġġanti u wrew li l-Programm miexi kif ippjanat u qed ikollu impatt reali, b’kisbiet maġġuri inklużi:
- l-istabbiliment tan-Netwerks Ewropej ta’ Referenza għall-mard rari;
- l-appoġġ lill-Istati Membri biex iżidu l-bini ta' kapaċità tagħhom biex jirreaġixxu meta jfaqqa’ mard transfruntier (eż. il-viruses tal-Ebola u taż-Żika);
- il-kontribut lejn il-politika dwar il-migrazzjoni tal-UE permezz tal-appoġġ lill-Istati Membri biex jirrispondu għall-bżonnijiet ta’ fluss għoli ta’ migranti u refuġjati; kif ukoll
- it-taħriġ ta’ professjonisti fil-kura medika u persunal ieħor tal-ewwel kuntatt biex jittratta l-bżonnijiet tas-saħħa ta’ dawn il-migranti u r-refuġjati.
Min iwettaq l-evalwazzjoni?
L-evalwazzjoni hi bbażata fuq studju estern imwettaq minn konsorzju magħmul minn Coffey International, Economisti Associati u SQW.
X’għandna nistennew mit-tieni nofs tat-terimnu tat-tielet Programm tas-Saħħa?
Nistennew appoġġ kontinwu fl-oqsma tat-tħejjija u l-immaniġġjar tal-kriżijiet u appoġġ lill-Istati Membri li qed jaħdmu biex jirriformaw is-sistemi tas-saħħa tagħhom u biex jilħqu l-għanijiet tal-iżvilupp sostenibbli. It-tielet Programm tas-Saħħa se jkompli wkoll jgħin fl-implimentazzjoni tal-leġiżlazzjoni tas-saħħa għall-kura tas-saħħa transkonfinali, il-prodotti mediċinali, l-apparat mediku, id-direttiva dwar il-prodotti tat-tabakk, id-deċiżjoni dwar it-theddid transkonfinali għas-saħħa u l-leġiżlazzjoni għal sustanzi ta’ oriġini umana. Se naħdmu wkoll biex insaħħu u nibnu rabtiet bejn il-Programm tas-Saħħa u l-aġenda ta’ politika usa' biex ikun hemm saħansitra impatt akbar.
L-attivitajiet fil-livell tal-UE
|
Il-Kummissjoni Ewropea – Saħħa u Sikurezza Alimentari |
|
Il-Kummissjoni Ewropea – Aġenzija Eżekuttiva għall-Konsumatur, is-Saħħa, l-Agrikoltura u l-Ikel |
L-aħbarijiet
|
L-evalwazzjoni ta' nofs it-terminu tal-ewwel tlett snin tal-implimentazzjoni tat-tielet Programm tas-Saħħa turi li l-Kummissjoni Ewropea għamlet progress kbir ħafna biex tilħaq l-objettivi tal-programm. |
|
Aqra r-rapporti u s-sommarju tal-evalwazzjoni ta' nofs it-terminu online Ir-Rapport tal-Kummissjoni, id-Dokument ta' Ħidma tal-Persunal tal-Kummissjoni, u s-Sommarju Eżekuttiv tal-evalwazzjoni ta' nofs it-terminu tat-tielet Programm tas-Saħħa huma kollha miftuħin u aċċessibbli għall-pubbliku. |
|
Lista tal-Punti Fokali Nazzjonali aġġornata Il-Punti Fokali Nazzjonali huma l-esperti nazzjonali għall-Programm tas-Saħħa fl-Istati Membri u l-pajjiż parteċipanti. Huma nnominati mill-ministeri nazzjonali tas-saħħa u jgħinu liċ-Chafea fl-implimentazzjoni tal-Programm tas-Saħħa. |
|
Iċ-CHAFEA twettaq kompiti li ġew fdati lilha mill-Kummissjoni, inkluża l-implimentazzjoni tal-Programm tas-Saħħa, u taħdem mill-qrib mad-Direttorati Ġenerali għas-Saħħa u s-Sikurezza Alimentari, għall-Ġustizzja u l-Konsumaturi u għall-Agrikoltura u l-Iżvilupp Rurali. Is-sede tagħha tinsab fil-Lussemburgu. |
|
L-investimenti qed isiru permezz tal-programm tar-riċerka tal-Kummissjoni Ewropea, Orizzont 2020. |
Il-Proġetti tal-Programm tas-Saħħa
|
Il-bażi tad-data estensiva tal-Aġenzija Eżekuttiva għall-Konsumatur, is-Saħħa, l-Agrikoltura u l-Ikel dan l-aħħar ingħatat dehra ġdida biex ikun iktar faċli li tiskopri aktar dwar kwalunkwe proġett iffinanzjat permezz tal-Programm tas-Saħħa tal-UE. |
Links interessanti oħrajn
|
L-objettivi, l-isfidi u r-riżultati mistennija ewlenin tal-programm huma spjegati b’mod ċar u fil-qosor f'din l-iskeda informattiva. |
|
Il-pubblikazzjonijiet tal-Programm tas-Saħħa Sib folji bl-informazzjoni, pakketti għall-istampa, brochures, kotba żgħar u aktar, kollha relatati ma’ proġetti ffinanzjati permezz tal-Programm tas-Saħħa. |