Newsletter Saħħa-UE 240 - Fokus

Għaxar azzjonijiet lejn it-tilqim għal kulħadd

Il-Kummissjoni Ewropea u l-Organizzazzjoni Dinjija tas-Saħħa (WHO) ospitaw b’mod konġunt Summit dwar it-Tilqim Globali fit-12 ta’ Settembru biex tiddawwar it-tendenza tat-tixrid tal-mard li jista’ jiġi evitat bit-tilqim u titwaqqaf il-miżinformazzjoni dwar it-tilqim. Id-diskussjonijiet huma miġbura fil-qosor fl-azzjonijiet u l-lezzjonijiet li ġejjin.

Kulħadd għandu jkun jista’ jibbenefika mis-setgħa tat-tilqim. Minkejja d-disponibbiltà ta’ tilqim sikur u effettiv, in-nuqqas ta’ aċċess, in-nuqqas ta’ tilqim, il-miżinformazzjoni, il-kompjaċenza lejn ir-riskji tal-mard, it-tnaqqis tal-fiduċja pubblika fil-valur tat-tilqim u n-nuqqas ta’ investimenti qed jagħmlu ħsara lir-rati tat-tilqim fid-dinja kollha. It-tilqim huwa bla ebda dubju wieħed mill-interventi l-aktar effettivi tas-saħħa pubblika. Għandna nistinkaw biex insostnu l-gwadanni tat-tilqim li ma kinux faċli biex inkisbu iżda għandu jkollna wkoll l-għan li nagħmlu iktar u aħjar, biex niksbu sistemi tas-saħħa effettivi u ekwi u nnaqqsu l-ħsara kkawżata minħabba l-mard u t-tbatija li jistgħu jiġu evitati. Dan ifisser ukoll li għandhom isiru l-investimenti meħtieġa fir-riċerka u l-iżvilupp biex jiġu indirizzati ħtiġijiet mediċi mhux issodisfati bl-iżvilupp ta’ tilqim ġdid u bit-titjib ta’ tilqlim eżistenti.

Lezzjonijiet mill-jum u l-azzjonijiet meħtieġa lejn it-tilqim għal kulħadd u lejn l-eliminazzjoni ta’ mard li jista’ jiġi evitat bit-tilqim:

1. Il-promozzjoni ta’ tmexxija politika globali u impenn għat-tilqim u l-bini ta’ kollaborazzjoni u sħubijiet, fil-livelli internazzjonali, nazzjonali, reġjonali u lokali mal-awtoritajiet tas-saħħa, il-professjonisti tas-saħħa, is-soċjetà ċivili, il-komunitajiet, ix-xjentisti, u l-industrija, biex kulħadd ikun protett kullimkien permezz ta’ rati ta’ kopertura għoljin u sostnuti ta’ tilqim.
2. L-iżgurar li l-pajjiżi kollha jkollhom fis-seħħ strateġiji nazzjonali ta’ immunizzazzjoni u jimplimentaw u jsaħħu s-sostenibbiltà finanzjarja tagħhom, f’konformità mal-progress lejn Kopertura tas-Saħħa Universali, biex ħadd ma jitħalla barra.
3. Il-bini ta’ sistemi ta’ sorveljanza b’saħħithom għal mard li jista’ jiġi evitat bit-tilqim, partikolarment dawk li jaqgħu taħt il-miri ta’ eliminazzjoni u eradikazzjoni globali.
4. L-indirizzar tal-kawżi bażiċi tal-eżitazzjoni għat-tilqim, iż-żieda fil-fiduċja fit-tilqim, kif ukoll it-tfassil u l-implimentazzjoni ta’ interventi bbażati fuq l-evidenza.
5. L-isfruttar tal-poter tat-teknoloġiji diġitali, b’mod li jissaħħaħ il-monitoraġġ tal-prestazzjoni tal-programmi tat-tilqim.
6. Iż-żamma tal-isforzi ta’ riċerka biex kontinwament tiġi ġġenerata data dwar l-effettività u s-sikurezza tat-tilqim u l-impatt tal-programmi ta’ tilqim.
7. It-tkomplija tal-isforzi u l-investiment, inklużi mudelli ġodda ta’ finanzjament u inċentivi, fir-riċerka, l-iżvilupp u l-innovazzjoni għal apparat ġdid jew imtejjeb tat-tilqim u l-konsenja tiegħu.
8. Il-mitigazzjoni tar-riskji tan-nuqqas ta’ tilqim permezz ta’ monitoraġġ tad-disponibbiltà, tat-tbassir, tal-akkwist u ta’ sistemi ta’ konsenja u ta’ ħażna mtejbin tat-tilqim u kollaborazzjoni mal-produtturi u l-parteċipanti kollha fil-katina tad-distribuzzjoni biex isir l-aħjar użu mill-kapaċità ta’ manifattura, jew saħansitra billi din tiżdied.
9. L-għoti tas-setgħa lill-professjonisti tal-kura tas-saħħa fil-livelli kollha kif ukoll lill-media, biex tiġi pprovduta informazzjoni effettiva, trasparenti u oġġettiva lill-pubbliku u biex tiġi miġġielda l-informazzjoni falza u qarrieqa, inkluż permezz ta’ pjattaformi tal-media soċjali u kumpaniji teknoloġiċi.
10. L-allinjament u l-integrazzjoni tat-tilqim fl-aġendi globali tas-saħħa u l-iżvilupp, permezz ta’ aġenda mġedda dwar l-Immunizzazzjoni għall-2030.

Attivitajiet fil-livell tal-UE

Aħbarijiet

Links interessanti oħrajn