Newsletter Saħħa-UE 260 - Fokus

Azzjonijiet ġodda proposti għall-bini ta’ Unjoni Ewropea tas-Saħħa aktar b’saħħitha u aktar reżiljenti

Sandra Gallina, id-Direttriit Ġenerali għas-Saħħa u s-Sikurezza Alimentari tal-Kummissjoni Ewropea, issemmi ftit mill-azzjonijiet li l-Kummissjoni pproponiet fil-11 ta’ Novembru għall-bini ta’ Unjoni Ewropea tas-Saħħa lesta biex tindirizza t-theddid għas-saħħa ta’ kull tip b’mod aktar koordinat u effettiv.

Għaliex huma meħtieġa miżuri ġodda?

Iż-żieda tar-rati ta’ infezzjoni bil-COVID-19 madwar l-Ewropa hija allarmanti ħafna. Jeħtieġ li tittieħed azzjoni deċiżiva minnufih biex l-Ewropa tipproteġi lin-nies, biex tittaffa l-pressjoni fuq is-sistemi tal-kura tas-saħħa, u biex tiġi kkontrollata l-imxija tal-virus. Ħadna passi biex nindirizzaw dawn l-oqsma fuq perjodu qasir ta’ żmien, iżda neħtieġu wkoll soluzzjonijiet aktar sostenibbli.

Iċ-ċittadini talbu lill-UE biex tagħmel aktar. Il-proposti l-ġodda tagħna se jgħinuna nirrispondu għall-ħtiġijiet tal-Istati Membri u biex nibnu Unjoni Ewropea tas-Saħħa b’saħħitha u reżiljenti li tkun tiflaħ għal theddid tas-saħħa fil-futur.

X'tgħallimt mill-pandemija?

It-tifqigħa tal-coronavirus għallmitna li jeħtieġ li nagħmlu xi titjib strutturali fil-mod kif naħdmu flimkien.

Id-Deċiżjoni tal-2013 dwar it-theddid transfruntier għas-saħħa wittiet it-triq għall-iskambju ta’ informazzjoni u l-akkwist konġunt għax-xiri ta’ kontromiżuri mediċi bħal tagħmir protettiv personali u tagħmir mediku bħal ventilaturi għall-isptarijiet. Salvat għadd kbir ta’ ħajjiet matul din il-kriżi u għenitna ninnegozjaw b’suċċess il-vaċċini kontra l-COVID-19. Issa, jeħtieġ li nibnu fuq dawn is-suċċessi u nindirizzaw in-nuqqasijiet f’oqsma bħall-koordinazzjoni ta’ miżuri ta’ rispons, settijiet ta’ data komuni u valutazzjonijiet tar-riskju biex intejbu l-livell ta’ tħejjija ġenerali tal-Ewropa.

X’inhuma l-proposti ewlenin biex insaħħu t-tħejjija u r-rispons tagħna għall-kriżijiet tas-saħħa?

Wieħed mill-modi ewlenin li nittamaw li ntejbu l-koordinazzjoni u t-tħejjija komuni tagħna huwa billi nsaħħu r-rwoli tas-sħab vitali li kellhom rwol kruċjali matul il-pandemija - iċ-Ċentru Ewropew għall-Prevenzjoni u l-Kontroll tal-Mard (ECDC) u l-Aġenzija Ewropea għall-Mediċini (EMA).

B’appoġġ akbar, l-ECDC jista’ jgħinna nżidu l-kapaċitajiet għat-tħejjija, is-sorveljanza, it-twissija bikrija, u l-valutazzjoni tar-riskju, filwaqt li EMA msaħħa tista’ tgħinna nindirizzaw il-vulnerabbiltà fil-ktajjen tal-provvista għall-prodotti mediċi u għall-mediċini permezz ta’ monitoraġġ u mitigazzjoni ta’ dawn is-sitwazzjonijiet.

Għandna wkoll il-ħsieb li nippubblikaw strateġija farmaċewtika ġdida biex nindirizzaw dawn in-nuqqasijiet mediċi matul żminijiet ta’ kriżi, iżda wkoll biex niżguraw l-affordabbiltà ta’ kontromiżuri mediċi bħal vaċċini u terapiji. F’livell globali, irridu nistaqsu fejn qed jiġu żviluppati l-mediċini. Irridu nagħmlu l-mediċini disponibbli għaċ-ċittadini kollha fl-UE u nipproteġu dak li l-Ewropej japprezzaw l-aktar – saħħithom.

Nixtieq inħabbar ukoll il-pjanijiet tagħna biex nistabbilixxu korp tal-UE għar-riċerka u l-iżvilupp li jiffoka fuq il-protezzjoni taċ-ċittadini tal-UE mill-influwenzi pandemiċi bħall-COVID-19 u minn theddid kimiku, bijoloġiku, radjoloġiku u nukleari. Dan il-korp il-ġdid se jkun simili fl-istruttura u fl-għan għall-Awtorità Bijomedika għar-Riċerka u l-Iżvilupp Avvanzati tal-Istati Uniti (BARDA).

Dawn il-proposti kollha jsaħħu r-rispons tagħna fil-livell tal-UE, iżda l-ġlieda kontra l-COVID-19 tiddependi fuq l-individwi kullimkien li jieħdu responsabbiltà personali u jsegwu l-linji gwida kollha biex titnaqqas it-trażmissjoni ta’ dan il-virus bla ħniena. Hu biss billi nuru solidarjetà u naħdmu flimkien li nistgħu negħlbu din il-kriżi. Flimkien aħna aktar b’saħħitna.

Attivitajiet fil-livell tal-UE

Aħbarijiet

Links interessanti oħrajn