L-interferenti endokrinali huma sustanzi kimiċi li taħt kundizzjonijiet speċifiċi jistgħu jkollhom impatt fuq is-sistema ormonali tal-bnedmin u l-annimali. L-interferenza endokrinali hi mod relattivament reċenti kif inħarsu lejn it-tossiċità tas-sustanzi kimiċi. Fis-snin reċenti, il-komunità xjentifika u l-awtoritajiet mad-dinja kollha ddiskutew dwar dan is-suġġett u kif jista’ jiġi regolat. Inkiseb progress sinifikanti, kemm fl-UE kif ukoll f’organizzazzjonijiet internazzjonali.
Niżviluppaw qafas leġiżlattiv
- Il-Kummissjoni Ewropea ilha li għandha Strateġija dwar l-Interferenti Endokrinali mill-1999. Ir-reviżjonijiet sussegwenti tal-leġiżlazzjoni tal-UE dwar is-sustanzi kimiċi qiesu din l-istrateġija. Is-Seba’ Programm ta’ Azzjoni Ambjentali (EAP), adottat fl-2013 mill-Parlament Ewropew u l-Kunsill, iwassal għall-armonizzazzjoni tal-kriterji bbażati fuq il-periklu għall-identifikazzjoni tal-interferenti endokrinali.
- Ir-Regolament dwar il-Prodotti għall-Protezzjoni tal-Pjanti (KE) 1107/2009 u r-Regolament dwar il-Prodott Bijoċidali (UE) 528/2012 jistabbilixxu kriterji xjentifiċi biex jiġu identifikati sustanzi bi proprjetajiet ta’ interferenti endokrinali.
- Id-dispożizzjonijiet regolatorji addizzjonali għall-interferenti endokrinali huma koperti minn REACH, ir-Regolament dwar il-kożmetiċi, u taħt il-leġiżlazzjoni tal-UE għall-materjal li jiġi f'kuntatt mal-ikel.
- Fil-15 ta’ Ġunju 2016 il-Kummissjoni adottat Komunikazzjoni li tippreżenta l-istat ta’ ħidma l-aktar reċenti fuq il-fajl u d-direzzjoni 'l quddiem. Approvat ukoll żewġ abbozzi ta’ atti legali li jistabbilixxu kriterji xjentifiċi biex jiġu identifikati l-interferenti endokrinali, li għaddew/għaddejjin mill-proċeduri ta’ adozzjoni rilevanti.
Sitwazzjoni attwali
Il-kriterji dwar il-prodotti bijoċidali huma ppubblikati u se japplikaw mis-7 ta’ Ġunju 2018.
Il-kriterji dwar il-prodotti għall-protezzjoni tal-pjanti huma ppubblikati u se japplikaw mill-10 ta’ Novembru 2018.
