It-tilqim hu l-għodda primarja għal prevenzjoni tal-mard u wieħed mill-aktar miżuri tas-saħħa pubblika kosteffettivi disponibbli.
L-immunizzazzjoni bit-tilqim hi l-aħjar difiża li għandna kontra mard serju, li jista’ jiġi evitat, u li xi drabi hu mard fatali u kuntaġġjuż.
Skont l-Organizzazzjoni Dinjija tas-Saħħa (WHO, World Health Organization), it-tilqim jipprevjeni madwar 3.5 miljun sa 5 miljun mewta madwar id-dinja kull sena u jnaqqas l-kostijiet tat-trattament speċifiku għall-mard.
Bis-saħħa tat-tilqim mifrux:
- Inqered il-ġidri.
- L-Ewropa nħelset mill-poljo.
- Ħafna mard ieħor ġie kważi eliminat.
Il-vaċċini użati fl-UE huma sikuri u effettivi
Hemm regoli stretti ħafna fl-Unjoni Ewropea għall-approvazzjoni ta’ kwalunkwe vaċċin li jiġi introdott fis-suq.
L-Aġenzija Ewropea għall-Mediċini (EMA, European Medicines Agency) twettaq l-evalwazzjoni u s-superviżjoni tal-vaċċini, hekk kif jiġu ddisinjati. Wara ttestjar komprensiv, il-Kummissjoni Ewropea mbagħad tkun tista’ toħroġ awtorizzazzjoni għat-tqegħid fis-suq.
Ladarba jiġi introdott vaċċin fis-suq, l-EMA tkompli tevalwa s-sikurezza tiegħu u twettaq sorveljanza wara l-awtorizzazzjoni. Dawn il-passi kollha huma mfasslin biex tiġi żgurata sikurezza massima, bl-objettiv aħħari tas-saħħa u l-benessri tal-popolazzjoni.
Il-komponenti kollha tal-vaċċini introdotti fis-suq fl-Unjoni Ewropea jgħaddu minn skrutinju intensiv u abbażi ta’ diversi studji dawn jitqiesu sikuri fil-kuntest ta’ dawk il-vaċċini.
Sfidi attwali
Illum, aktar minn 100 miljun tifel u tifla madwar id-dinja huma mlaqqma kull sena kontra mard bħad-difterite, it-tetnu, il-pertussis, it-tuberkulożi, il-poljo, il-ħosba, u l-epatite B.
Madankollu, filwaqt li l-programmi ta’ immunizzazzjoni fit-tfulija salvaw miljuni ta’ ħajjiet, l-UE u l-pajjiżi ġirien għadhom qed jiffaċċjaw tifqigħat ta’ mard li jista’ jiġi evitat b’vaċċin minħabba rati insuffiċjenti ta’ kopertura tat-tilqim.
Barra minn hekk, approċċ tul il-ħajja għat-tilqim huwa essenzjali biex jiġi massimizzat il-potenzjal sħiħ tal-immunizzazzjoni fl-etajiet kollha. Dan ifisser li dak li jkun jibqa’ aġġornat fir-rigward tal-vaċċini rakkomandati, f’konformità mal-iskedi u l-linji gwida nazzjonali.
L-ostakli potenzjali għat-tilqim huma kumplessi u jinkludu taħlita ta’ fatturi, bħal aċċess limitat għas-servizzi ta’ immunizzazzjoni, provvista mfixkla, kunflitt u instabbiltà, jew informazzjoni ħażina dwar il-vaċċini.
L-isfidi għall-fiduċja pubblika fit-tilqim, id-differenzi ġeografiċi fl-aċċessibbiltà u fit-teħid, u ż-żieda tal-informazzjoni falza u qarrieqa dwar it-tilqim huma kawża ta’ tħassib u sfida ewlenija għall-esperti tas-saħħa pubblika.
L-iżgurar ta’ aċċess ekwu għall-vaċċini għaċ-ċittadini kollha tal-UE, il-ġlieda kontra l-miżinformazzjoni u d-diżinformazzjoni, u t-titjib tal-fiduċja fil-vaċċini huma objettivi kondiviżi mill-Kummissjoni Ewropea u l-Istati Membri tal-UE.
Azzjoni fil-livell tal-UE
Il-politika dwar it-tilqim hi kompetenza tal-awtoritajiet nazzjonali, iżda l-Kummissjoni Ewropea tappoġġja lill-pajjiżi tal-UE biex jikkoordinaw il-politiki u l-programmi tagħhom.
F’Diċembru 2018, il-Ministri tas-Saħħa tal-UE adottaw Rakkomandazzjoni tal-Kunsill dwar kooperazzjoni msaħħa kontra mard li jista’ jiġi evitat bil-vaċċini.
Din l-inizjattiva ta’ politika titlob azzjonijiet bħall-koordinazzjoni tal-akkwist tal-vaċċini, l-appoġġ għar-riċerka u l-innovazzjoni, u l-indirizzar tal-eżitazzjoni għat-tilqim. L-objettiv ġenerali huwa li jiżdied it-teħid tat-tilqim fl-UE minn perspettiva tul il-ħajja.
- Pjan direzzjonali għall-implimentazzjoni ta’ azzjonijiet
- Rakkomandazzjoni tal-Kunsill
- Komunikazzjoni tal-Kummissjoni
- M&T
- Video (sottotitli disponibbli bl-EN, FR, DE, IT, RO)
- Skeda informattiva (disponibbli bil-FR, DE, IT, PT, RO)
- Proċess ta’ konsultazzjoni
- Skeda informattiva - Implimentazzjoni tal-azzjonijiet tal-UE biex tingħata spinta lill-fiduċja fil-vaċċini
Barra minn hekk, il-Kummissjoni tappoġġja lill-pajjiżi tal-UE fiż-żamma jew fiż-żieda tar-rati tat-tilqim billi:
- tippromwovi t-tilqim kontra l-influwenza staġjonali għal gruppi f’riskju.
- tinkoraġġixxi lill-pajjiżi tal-UE biex jiżguraw li t-tfal kollha jiġu mlaqqmin
- tawtorizza l-użu ta’ tliet vaċċini kontra l-kanċer ċervikali
- tgħin lill-pajjiżi tal-UE fl-iżvilupp ta’ strateġija ta’ tilqim kontra l-influwenza pandemika tal-H1N1 (jew l-“influwenza tal-ħnieżer”)
- tqajjem għarfien dwar l-importanza tal-immunizzazzjoni u tappoġġja l-attivitajiet tal-pajjiżi tal-UE fil-kuntest tal-Ġimgħa Ewropea tal-Immunizzazzjoni, indikata kull sena fl-aħħar ġimgħa ta’ April.
Bejn l-2022 u l-2025, il-Kummissjoni Ewropea mexxiet kampanja ta’ komunikazzjoni bl-isem ta’ #UnitedInProtection biex tqajjem kuxjenza dwar il-benefiċċji ta’ approċċ tul il-ħajja għat-tilqim.
Il-kampanja kellha l-għan li tappoġġa t-teħid ta’ deċiżjonijiet infurmati dwar it-tilqim b’mod speċifiku kontra:
- il-ħosba
- l-influwenza staġjonali
- il-COVID-19
- il-virus tal-papilloma uman
- il-virus tal-epatite B
- il-pertussis (sogħla konvulżiva).
Il-kampanja kellha enfasi speċjali fuq gruppi tal-popolazzjoni rilevanti f’pajjiżi b’livell baxx ta’ teħid jew fiduċja fit-tilqim permezz ta’ materjal ta’ komunikazzjoni mmirat u sħubijiet mal-professjonisti tas-saħħa.
Wieħed mill-għanijiet tal-Pjan tal-Ewropa biex Jingħeleb il-Kanċer hu li jelimina l-kanċer ċervikali billi jlaqqam liż-żgħażagħ kontra l-papillomavirus uman (HPV, Human Papillomavirus) li jikkawżah u li hu marbut ukoll mal-kanċer tar-ras u tal-għonq, u mal-kanċer anali.
B’mod speċifiku, il-Pjan jitlob li titlaqqam mill-anqas 90% tal-popolazzjoni fil-mira tal-bniet tal-UE u li tiżdied b’mod sinifikanti r-rata ta’ tilqim fost is-subien.
Fl-2024, il-Kummissjoni ppreżentat proposta għal Rakkomandazzjoni tal-Kunsill dwar kanċers li jistgħu jiġu evitati bil-vaċċini biex tappoġġa lill-pajjiżi tal-UE fit-tisħiħ tat-teħid tat-tilqim kontra l-Virus tal-Papilloma Uman (HPV) u l-virus tal-Epatite B (HBV, Hepatitis B virus).
Ir-rakkomandazzjonijiet lill-pajjiżi tal-UE se jinkludu l-iffaċilitar tal-aċċess għat-tilqim, komunikazzjoni mmirata dwar l-importanza tat-tilqim kontra l-HPV u l-HBV f’perspettiva ta’ prevenzjoni tal-kanċer u monitoraġġ aħjar tar-rati ta’ kopertura tat-tilqim biex tiġi infurmata l-azzjoni tas-saħħa pubblika.
Vaċċini sikuri kontra l-COVID-19 għall-Ewropej
- Fis-17 ta’ Ġunju 2020, il-Kummissjoni Ewropea ppreżentat strateġija tal-UE għall-vaċċini kontra l-COVID-19 biex tħaffef l-iżvilupp, il-manifattura u l-varar ta’ vaċċini kontra l-COVID-19. Vaċċini sikuri u effettivi kontra s-SARS-CoV-2, il-virus responsabbli għall-COVID-19, huma l-aħjar ħaġa li għandna biex gradwalment tintemm il-pandemija.
- Fil-15 ta’ Ottubru 2020, il-Kummissjoni ppubblikat Komunikazzjoni dwar it-tħejjija għall-istrateġiji tal-COVID-19 u għall-varar tal-vaċċini li tippreżenta l-elementi ewlenin li l-Istati Membri għandhom iqisu fil-pjanijiet nazzjonali tagħhom tat-tilqim kontra l-COVID-19, b’mod partikolari d-definizzjoni ta’ gruppi prijoritarji għat-tilqim.
- Skopri aktar dwar l-azzjonijiet tal-Kummissjoni biex tappoġġja l-użu ta’ vaċċini sikuri u effettivi globalment: Vaċċini sikuri kontra l-COVID-19 għall-Ewropej
Azzjoni Konġunta dwar it-Tilqim
Il-Kummissjoni Ewropea ssaħħet l-appoġġ tagħha għall-isforzi nazzjonali biex tiżdied il-kopertura tat-tilqim, inkluż permezz tal-Azzjoni Konġunta dwar it-Tilqim kofinanzjata mill-Programm tas-Saħħa tal-UE (€3.55 miljun).
L-Azzjoni Konġunta dwar it-Tilqim, li tnediet fl-2018, indirizzat l-eżitazzjoni għat-tilqim u fittxet li żżid il-kopertura tat-tilqim fl-UE. Hi kkoordinata mill-INSERM (Franza) u tinvolvi 20 pajjiż sħab (fosthom 17-il pajjiż tal-UE u 3 pajjiżi mhux tal-UE).
Hi taħdem ukoll lejn it-tisħiħ tal-kooperazzjoni ta’ gruppi konsultattivi nazzjonali ta’ immunizzazzjoni (NITAGs) bl-għan li jiżdiedu t-trasparenza u l-fiduċja fil-proċess tat-teħid tad-deċiżjonijiet rigward l-introduzzjoni ta’ vaċċini ġodda.
Koalizzajoni għat-Tilqim
Fir-rebbiegħa tal-2019 ġiet stabbilita Koalizzjoni għat-Tilqim li tlaqqa’ flimkien l-assoċjazzjonijiet tal-professjonisti tas-saħħa u tal-istudenti Ewropej biex jippromwovu t-tilqim fil-ħidma tagħhom maċ-ċittadini u l-pari. Il-membri tal-Koalizzjoni għat-Tilqim huma impenjati li jagħtu informazzjoni preċiża lill-pubbliku, jiġġieldu kontra l-miti dwar it-tilqim u l-vaċċini, u jiskambjaw l-aħjar prattiki.
Informazzjoni relatata
- Portal Ewropew ta’ Informazzjoni dwar it-Tilqim
- Vaccines: concerns, questions and false claims (Aġenzija Ewropea għall-Mediċini (EMA))
- Ewrobarometru - L-attitudnijiet tal-Ewropej lejn it-tilqim
- Glossarju tat-tilqim
- Ċentru Ewropew għall-Prevenzjoni u l-Kontroll tal-Mard
- Stat ta’ Fiduċja fil-Vaċċini fl-UE u fir-Renju Unit: rapport tal-2020
- Stat ta’ Fiduċja fil-Vaċċini fl-UE (rapport aġġornat, bi statistika ġdida għall-Iżvezja): rapport 2018 – skeda informattiva fil-qosor
- L-organizzazzjoni u l-għoti tas-servizzi tat-tilqim: rapport sħiħ – 28 skeda tal-pajjiżi
