L-UE, flimkien ma’ ħafna iktar pajjiżi u organizzazzjoni internazzjonali, hija konxja mit-theddida tar-Reżistenza għall-Antimikrobiċi (AMR, antimicrobial resistance) u qed tindirizza din il-kwistjoni fl-ogħla livell politiku, billi tieħu azzjoni biex tindirizza din l-isfida dinjija urġenti.
Il-kooperazzjoni internazzjonali hija element ewlieni tal-Pjan ta’ Azzjoni dwar l-AMR tal-2017 u tar-Rakkomandazzjoni tal-Kunsill dwar l-AMR tal-2023, li jiddeskrivu azzjonijiet biex jiġi intensifikat l-involviment tal-UE f’inizjattivi dinjin għall-ġlieda kontra l-AMR.
Id-dikjarazzjonijiet tal-G7 u tal-G20 (2024) juru li l-problema teħtieġ sforzi konġunti ta’ governanza dinjija, skont l-approċċ “Saħħa Waħda”.
Il-Kummissjoni taħdem mill-qrib fil-livell dinji ma’ organizzazzjonijiet kwadripartitiċi u mas-Segretarjat Konġunt Kwadripartitiku dwar l-AMR:
- l-organizzazzjoni Dinjija tas-Saħħa (WHO, World Health Organization) hija involuta fl-implimentazzjoni tal-Pjan ta’ Azzjoni Dinji dwar l-AMR
- l-Organizzazzjoni tal-Ikel u l-Agrikoltura tan-Nazzjonijiet Uniti (FAO, Food and Agriculture Organization) taqdi rwol ewlieni fejn jidħol l-appoġġ lill-gvernijiet, lill-produtturi, lin-negozjanti u lil partijiet ikkonċernati oħra biex jadottaw miżuri ħalli jxejnu l-użu tal-antimikrobiċi u jipprevjenu l-iżvilupp tal-AMR. L-FAO rrevediet il-Pjan ta’ Azzjoni tagħha dwar ir-Reżistenza għall-Antimikrobiċi 2021–2025. Fl-44 Konferenza tal-FAO, ġiet adottata r-Riżoluzzjoni tal-Konferenza tal-FAO dwar l-Indirizzar tal-AMR fis-Sistemi Agroalimentari
- l-Organizzazzjoni Dinjija għas-Saħħa tal-Annimali (WOAH, World Organisation for Animal Health) hija impenjata li tipprevjeni l-AMR madwar id-dinja permezz ta’ azzjonijiet differenti:
- il-promozzjoni tal-użu responsabbli u prudenti tal-aġenti antimikrobiċi fil-mediċina veterinarja biex tiġi ppreservata l-effikaċja terapewtika tagħhom kemm fl-annimali kif ukoll fil-bnedmin
- it-titjib tal-għarfien u tal-monitoraġġ tal-kwantitajiet ta’ antimikrobiċi użati fit-trobbija tal-annimali.
- il-programm tan-Nazzjonijiet Uniti għall-Ambjent (UNEP, United Nations Environment Programme) qed jaħdem biex jipprovdi evidenza bbażata fuq ix-xjenza li tinforma l-istrateġiji dwar l-AMR u tiżgura li d-dimensjonijiet ambjentali jkunu riflessi b’mod adegwat fir-rispons “saħħa waħda” għall-AMR. F’Diċembru 2025, fis-seba’ sessjoni tal-Assemblea tan-Nazzjonijiet Uniti għall-Ambjent (UNEA, United Nations Environment Assembly), ġiet adottata riżoluzzjoni dwar id-dimensjonijiet ambjentali tal-AMR.
Il-Kummissjoni Ewropea qed tappoġġa l-Pjattaforma ta’ Sħubija bejn Diversi Partijiet Ikkonċernati dwar l-AMR stabbilita mill-organizzazzjonijiet kwadripartitiċi, u tinvolvi ruħha b’mod attiv fiha, biex toħloq viżjoni dinjija kondiviża u aktar kunsens dwar l-AMR.
F’Settembru 2024, it-tieni laqgħa ta’ Livell Għoli tal-Assemblea Ġenerali tan-Nazzjonijiet Uniti (AĠNU) dwar l-AMR wasslet biex jiżdiedu l-impenji fil-livell dinji biex tiġi indirizzata l-AMR, permezz ta’ dikjarazzjoni politika ġdida, approvata mill-pajjiżi membri tan-NU u tal-Istati Membri tal-UE.
Fosthom insibu azzjonijiet konkreti biex tiġi indirizzata l-AMR fis-setturi kollha permezz tal-approċċ “saħħa waħda” li jirrikonoxxi li s-saħħa tal-bniedem u tal-annimali u s-saħħa ambjentali huma intrinsikament marbuta.
Barra minn hekk, fir-raba’ Konferenza Ministerjali Dinjija ta’ Livell Għoli dwar l-AMR, li saret fl-Arabja Sawdija f’Novembru 2024, ġew adottati l-Impenji ta’ Jeddah biex xi elementi tad-Dikjarazzjoni Politika tal-AĠNU jissarrfu f’azzjonijiet konkreti.
L-UE tipprovdi wkoll il-kapaċità tal-iżvilupp u tappoġġa l-azzjonijiet fir-rigward tal-AMR f’pajjiżi b’introjtu baxx u medju, permezz tal-Fond Fiduċjarju Multidonatur tan-NU għall-AMR (MPTF, Multi-Partner Trust Fund), li jappoġġa l-implimentazzjoni tal-pjanijiet ta’ azzjoni nazzjonali fir-rigward tal-AMR ibbażati fuq l-approċċ “saħħa waħda” .
Il-Kummissjoni u xi istituzzjonijiet Ewropej oħra, inkluż iċ-Ċentru Ewropew għall-Prevenzjoni u l-Kontroll tal-Mard (ECDC, European Centre for Disease Prevention and Control), l-Aġenzija Ewropea għall-Mediċini (EMA, European Medicines Agency) u l-Awtorità Ewropea dwar is-Sigurtà fl-Ikel (EFSA, European Food Safety Authority), jikkooperaw mill-qrib mal-gvernijiet u l-aġenziji tal-Istati Uniti, tal-Kanada, tan-Norveġja u tar-Renju Unit fit-Task Force Trans-Atlantika dwar ir-Reżistenza Antimikrobika (TATFAR, Trans-Atlantic Task Force for Antimicrobial Resistance).
Il-Kummissjoni qed tappoġġa wkoll lill-Organizzazzjoni għall-Kooperazzjoni u l-Iżvilupp Ekonomiċi (OECD, Organisation for Economic Co-operation and Development) fl-isforzi tagħha biex tivvaluta l-impatt ekonomiku tal-AMR permezz tal-approċċ “saħħa waħda”.
Fost dawn l-attivitajiet insibu diversi għażliet ta’ politika biex tiġi indirizzata l-AMR, kif ukoll biex jiġu evalwati l-ispejjeż relatati mal-AMR u l-impatt tal-politiki fuq is-suq tax-xogħol u l-ekonomija usa’ (rapporti tal-OECD tal-2023: Embracing a One Health Framework to Fight Antimicrobial Resistance; Fighting Antimicrobial Resistance in EU and EEA countries).
Barra minn hekk, l-UE kienet u għadha tappoġġa bil-qawwa l-użu responsabbli tal-antimikrobiċi u ppromwoviet miżuri għat-tnaqqis tar-reżistenza għall-antimikrobiċi fil-katina alimentari permezz tat-Task Force tal-Codex dwar l-AMR bejn l-2007 u l-2011 u bejn l-2017 u l-2021.
Dawn l-isforzi rriżultaw f’żewġ linji gwida u f’kodiċi ta’ kondotta, li issa huma disponibbli f’pubblikazzjoni konsolidata. Dawn jipprovdu gwida biex jgħinu lill-gvernijiet ifasslu u jimplimentaw strateġiji effettivi għall-immaniġġar tal-AMR ta’ oriġini alimentari.
L-eżempji mogħtija hawn fuq huma sempliċiment rappreżentattivi u ma jikkostitwux lista eżawrjenti ta’ azzjonijiet li għaddejjin bħalissa jew ippjanati.
