Meta jkunu qed jabbozzaw il-proposti tas-saħħa, min ifassal il-politika jeħtieġ data fuq firxa wiesgħa ta’ fatturi li jaffettwaw is-saħħa, bħall-ambjent soċjali, ekonomiku u dak amministrattiv.
L-UE tiġbor indikaturi fuq ħafna minn dawn il-kwistjonijiet deskritti hawn taħt.
Indikaturi dwar l-iżvilupp sostenibbli
Fl-2016 il-Kummissjoni Ewropea varat Komunikazzjoni dwar Il-passi li jmiss għal ġejjieni Ewropew sostenibbli [COM(2016)739]. Hi tiddeskrivi l-politiki li jikkontribwixxu għas-17-il Għan ta’ Żvilupp Sostenibbli tan-Nazzjonijiet Uniti (SDGs), b'mod partikolari għall-SDG 3 biex jiġu żgurati ħajjiet b’saħħithom u jiġi promoss il-benesseri għal kulħadd tkun xi tkun l-età.
Fl-2017 il-Kummissjoni Ewropea żviluppat is-sett ta’ indikaturi għall-SDG tal-UE. Għall-fini tal-ewwel rapport ta’ monitoraġġ tal-SDG, ġew magħżula dawn is-sitt indikaturi għall-Għan 3 dwar is-saħħa u l-benesseri:
- L-aspettattiva ta’ tul tal-ħajja mat-twelid
- Is-saħħa kif perċepita mill-individwu
- Il-prevalenza tat-tipjip
- Ir-rata ta' mortalità minħabba l-mard kroniku
- Ir-rata ta’ suwiċidju
- Ħtieġa awtodikjarata mhux issodisfata għal kura medika.
Barra minn hekk, l-indikaturi għal Għanijiet tal-SDG oħra ġew ukoll attribwiti lill-Għan 3 bħala “indikatur b’finijiet multipli” bħal:
- Ir-rata ta’ obeżità
- Il-persuni maqtula f’aċċidenti fuq ix-xogħol
- Il-persuni maqtula f’aċċidenti tat-toroq
- It-tfixkil mill-ħsejjes
- Il-konċentrazzjoni tal-materja partikolata.
Xi wħud minn dawn l-indikaturi huma komuni għal-lista mqassra tal-Indikaturi Bażiċi tas-Saħħa Ewropej (ECHI).
Evalwazzjoni tal-progress
Il-Kummissjoni Ewropea tevalwa l-progress lejn l-għanijiet maqbula f’rapport annwali dwar il-monitoraġġ tal-SDG. L-ewwel rapport ta’ Monitoraġġ tal-2017 dwar il-progress lejn l-SDGs f'kuntest tal-UE hu disponibbli flimkien ma’ diversi għodod addizzjonali biex tiġi vvalutata s-sitwazzjoni tal-UE.
- L-approċċ tal-UE għal żvilupp sostenibbli
- Ħarsa ġenerali tal-Eurostat dwar l-Għanijiet ta’ Żvilupp Sostenibbli
- L-Iżvilupp Sostenibbli fl-Unjoni Ewropea - Ħarsa ġenerali tal-progress lejn l-SDGs f’kuntest tal-UE
- Il-PDG u lil hinn minnu
- Approċċ aktar ekoloġiku għas-Semestru Ewropew
- Is-saħħa globali
- Il-Kejl tad-Distanza għall-Għanijiet tal-SDG - Valutazzjoni ta’ fejn jinsabu l-pajjiżi tal-OECD (Ġunju 2017)
Pilastru Ewropew tad-Drittijiet Soċjali
Il-Pilastru Ewropew tad-Drittijiet Soċjali għandu jwassal għal Ewropa aktar soċjali u ġusta u hu prijorità ewlenija għall-Kummissjoni Ewropea. Il-parti tal-Appoġġ pubbliku / tal-Protezzjoni soċjali u l-inklużjoni tinkludi indikaturi dwar il-kura tas-saħħa:
- Il-ħtieġa awtodikjarata mhux issodisfata għal kura medika
- L-infiq mill-but għall-kura tas-saħħa
- Is-snin ta’ ħajja b’saħħitha fl-età ta' 65.
Ara wkoll l-indikaturi soċjali tal-UE u l-Qafas għall-Evalwazzjoni Konġunta (JAF) dwar is-Saħħa.
Indikaturi tas-saħħa taż-Żgħażagħ tal-UE
L-Istrateġija taż-Żgħażagħ tal-UE tistabbilixxi qafas għall-kooperazzjoni għall-2010-2018. Hi għandha l-għan li tipprovdi aktar opportunitajiet indaqs għaż-żgħażagħ u li tinkoraġġixxi l-parteċipazzjoni attiva tagħhom fis-soċjetà. B’riżultat ta’ dan, se tiżgura li jitqiesu l-kwistjonijiet dwar iż-żgħażagħ meta jiġu fformulati, implimentati u evalwati politiki u azzjonijiet li jista’ jkollhom impatt sinifikanti fuq iż-żgħażagħ, bħall-edukazzjoni, l-impjiegi jew is-saħħa u l-benesseri.
- Il-Monitoraġġ Ewropew dwar iż-Żgħażagħ
- Ir-Rapport dwar iż-Żgħażagħ tal-UE
- Ir-Rakkomandazzjoni tal-Kummissjoni tal-20 ta’ Frar 2013 “L-investiment fit-tfal: niksru ċ-ċiklu tal-iżvantaġġ”
Indikaturi tal-kwalità tal-kura tas-saħħa u l-miżuri rrappurtati mill-pazjenti
Il-proġett dwar l-Indikaturi tal-Kwalità tal-Kura tas-Saħħa (HCQI), immexxi mill-Organizzazzjoni għall-Kooperazzjoni u l-Iżvilupp Ekonomiċi (OECD) bl-appoġġ tal-Kummissjoni Ewropea, għandu l-għan li jkejjel u jqabbel il-kwalità tas-servizz tas-saħħa f’pajjiżi differenti. L-oqsma ewlenin huma:
- Il-Kura Primarja
- Il-Kura Akuta
- Il-Kura tas-Saħħa Mentali
- Il-Kura tal-Kanċer
- Is-Sikurezza tal-Pazjenti
- Ir-Reazzjoni u l-Esperjenzi tal-Pazjenti
B’mod tipiku, is-suċċess tal-kura tas-saħħa hu vvalutat fuq il-bażi tar-rati ta’ sopravvivenza, jew ir-rati tal-kura, wara t-trattament. Dan għandu t-tendenza li jaħbi differenzi importanti, li joħorġu biss meta jitqiesu l-eżiti u l-esperjenzi rrappurtati mill-pazjenti stess.
L-Istħarriġ dwar l-Indikaturi Rrappurtati mill-Pazjenti (PaRIS) tal-OECD, bl-appoġġ tal-Kummissjoni, se jindirizza nuqqasijiet kritiċi tal-informazzjoni u jibni ħarsa ċċentrata fuq il-pazjent tal-prestazzjoni tas-sistema tas-saħħa.
Qed jiġu żviluppati ħidma biex ikun hemm aċċellerazzjoni tal-adozzjoni u r-rapportar ta’ indikaturi rrappurtati mill-pazjenti f’oqsma ta’ mard individwali (kanċer tas-sider, bdil tal-ġenb u l-irkoppa u s-saħħa mentali) u stħarriġ ġdid internazzjonali tal-pazjenti (b’fokus fuq kundizzjonijiet kumplessi u kroniċi li jiġu ttrattati fil-kura primarja).
