Gwida pass pass

Skont id-Direttiva dwar il-Prodotti tat-Tabakk (2014/40/UE), il-manifatturi u l-importaturi tal-prodotti tat-tabakk, is-sigaretti elettroniċi u l-kontenituri ta’ rikarika jridu jissottomettu informazzjoni ewlenija lill-awtoritajiet tal-Istati Membri fejn qed jippjanaw li jippromwovu l-prodotti. L-għodda tal-IT li tipprovdi din l-informazzjoni tissejjaħ Punt tad-Dħul Komuni tal-UE (EU-CEG).

Kif tuża s-sistema tal-Punt tad-Dħul Komuni tal-UE (EU-CEG) biex tissottometti informazzjoni lill-Istati Membri tal-UE dwar il-prodotti tat-tabakk, is-sigaretti elettroniċi u l-kontenituri ta’ rikarika f’konformità mad-Direttiva dwar il-Prodotti tat-Tabakk 2014/40/UE

Jekk jogħġbok aqra din l-informazzjoni bir-reqqa qabel tibda.

1) Hemm bżonn nirreġistra għal “ID tas-sottomittent”?

Trid tirreġistra għal ID tas-sottomittent jekk:

• inti manifattur jew importatur tal-prodotti tat-tabakk, tas-sigaretti elettroniċi jew tar-rikariki.
  Se jkollok tuża l-ID tas-sottomittent tiegħek kull darba li tissottometti l-informazzjoni dwar il-prodott bl-użu tal-EU-CEG. Għandek ukoll tikkwotah f’kull korrispondenza dwar l-informazzjoni dwar il-prodott li tissottometti.

M’GĦANDEKX bżonn ID tas-sottomittent jekk:

• inti parti terza (eż. kumpanija jew konsulent li ġie mqabbad mill-manifattur/importatur) li qed tissottometti informazzjoni f’isem manifattur/importatur.

Anki jekk ġejt mitlub tirreġistra għal ID tas-sottomittent f’isem manifattur jew importatur, trid timla’ formola ta’ reġistrazzjoni billi tuża d-dettalji tal-kumpanija tal-manifattur jew l-importatur.

2) Kif tirreġistra għal ID tas-sottomittent

Segwi dawn il-passi biex titlob ID tas-sottomittent:

1. Jekk għad m’għandekx wieħed, oħloq kont tal-EU Login
2. Niżżel il-formola ta’ reġistrazzjoni – Biex tniżżel il-file, ikklikkja l-buttuna tal-lemin tal-mouse u agħżel “issejvja l-link bħala”
3. Imla l-formola
4. Issottometti l-formola (segwi l-istruzzjonijiet fuq il-formola).

Ladarba nirċievu l-formola kompluta tiegħek, nibdew il-proċess ta’ assenjazzjoni tal-ID tas-sottomittent tiegħek.

Dan jista’ jieħu diversi jiem, speċjalment waqt żmien fejn ikollna ħafna xogħol, allura nitolbuk tieħu ftit tal-paċenzja. Barra minn hekk, l-assenjazzjoni ta’ ID tas-sottomittent hi biss pass intermedjarju biex tipprovdi lill-entità tiegħek b’aċċess għall-EU-CEG.

Is-sottomissjonijiet permezz tal-EU-CEG se jkunu possibbli biss mal-wasla tal-identifikatur PARTY tiegħek li jeħtieġ żmien addizzjonali għall-ipproċessar sa diversi jiem. Madankollu, ladarba l-ID tas-sottomittent ikun ġie assenjat ikun diġà possibbli li tniżżel l-XML Creator Tool u tibda taħdem fuq il-files XML tiegħek; tista’ tniżżlu mill-grupp ta’ interess tas-CIRCABC.

Qabel ma noħorġu l-ID tas-sottomittent tiegħek, jaf ikollna nistaqsuk għal xi informazzjoni addizzjonali. Nirriżervaw ukoll id-dritt li nirrevokaw ID tas-sottomittent, jekk ikun hemm bżonn.

3) Sottomissjoni ta’ informazzjoni dwar prodotti tat-tabakk

L-informazzjoni li għandek bżonn tissottometti bl-użu tal-EU-CEG hi elenkata hawnhekk:

L-Artikolu 5 tad-Direttiva 2014/40/UE u d-deċiżjoni ta’ implimentazzjoni dwar is-sottomissjoni ta’ informazzjoni dwar prodotti tat-tabakk.

Għandek tissottometti din l-informazzjoni lill-awtoritajiet rilevanti tal-Istati Membri qabel ma tintroduċi fis-suq xi prodotti ġodda jew modifikati.

Ara d-dizzjunarju tad-data tal-prodotti tat-tabakk għal aktar dettalji dwar l-informazzjoni meħtieġa. Partijiet minn dan id-dizzjunarju jistgħu japplikaw ukoll għal prodotti tat-tipjip erbali.

4) Sottomissjoni ta’ informazzjoni dwar is-sigaretti elettroniċi u l-kontenituri ta’ rikarika

L-informazzjoni li għandek bżonn tissottometti bl-użu tal-EU-CEG hi elenkata hawnhekk:

L-Artikolu 20 tad-Direttiva 2014/40/UE u d-deċiżjoni ta’ implimentazzjoni dwar is-sottomissjoni ta’ informazzjoni dwar is-sigaretti elettroniċi u l-kontenituri ta’ rikarika.

Trid tissottometti din l-informazzjoni lill-awtoritajiet rilevanti tal-Istati Membri 6 xhur qabel id-data meta beħsiebek tintroduċi fis-suq kwalunkwe prodott ġdid jew sostanzjalment modifikat.

Ara d-dizzjunarju tad-data tas-sigaretti elettroniċi u tal-kontenituri ta’ rikarika għal aktar dettalji dwar l-informazzjoni meħtieġa. Partijiet minn dan id-dizzjunarju jistgħu japplikaw ukoll għall-prodotti bla nikotina.

5) Għażliet tekniċi għas-sottomissjoni tad-data

Ladarba jkollok ID tas-sottomittent, ikollok żewġ għażliet kif tissottometti l-informazzjoni dwar il-prodott lill-Istati Membri tal-UE permezz tal-EU-CEG:

1. Soluzzjoni awtonoma (standalone) (għal kumpaniji li għandhom infrastruttura tal-IT żgħira):
   Il-kumpaniji jużaw ġeneratur XML biex joħolqu preżentazzjonijiet li jistgħu jittellgħu fl-EU-CEG aktar tard.
   Il-files XML differenti jridu jittellgħu permezz tal-pjattaforma eTrustEx għad-DĠ SANTE. Jekk ikollok xi mistoqsijiet, jekk jogħġbok ikkuntattja l-appoġġ tekniku (ara t-tab “Kuntatti”)
2. Soluzzjoni minn sistema għal oħra (għal kumpaniji li għandhom infrastruttura tal-IT kbira jew bosta prodotti):
   Biex tagħmel preżentazzjonijiet minn sistema għal oħra, teħtieġ aċċess għan-network e-Delivery. Dan in-network hu mmaniġġjat mill-Kummissjoni biex jippermetti li l-informazzjoni tkun tista’ tiġi trasferita b’mod sigur u affidabbli. Malli tasal l-ID tas-sottomittent, id-dipartiment tal-IT tal-Kummissjoni jikkuntattjak biex jgħaddilek aktar struzzjonijiet għall-konfigurazzjoni ta’ din is-soluzzjoni teknika.

Minħabba rekwiżiti tekniċi, is-sistema tippermetti biss fajls mhux akbar minn 100 MB. Għal aktar informazzjoni dwar dawn iż-żewġ għażliet, ara l-linji gwida tekniċi tagħna u/jew żur il-librerija online CIRCABC tal-Kummissjoni (ara t-“taqsima tad-downloads”).

Stqarrija ta’ privatezza

Biex tiskopri kif nużaw u nipproteġu d-data personali tiegħek, jekk jogħġbok aqra l-istqarrija ta’ privatezza tagħna.

Aktar informazzjoni u kuntatt

Jekk ikollok problemi tekniċi jew mistoqsijiet ġenerali dwar l-EU-CEG, jekk jogħġbok:

• Sib aktar informazzjoni dwar il-Punt tad-Dħul Komuni tal-UE (EU-CEG) u kif jaħdem
• Ikkuntattja lit-tim tal-EU-CEG